É a primeira pedra do ambicioso proxecto Academia Literaria de Rianxo para converter en museos as casas de Castelao, Dieste e Manuel Antonio. Ao longo de tres andares chégase a coñecer moi a fondo as facetas literaria, política, social ou familiar do autor rianxeiro. Manuel Antonio naceu nesta casa e viviu nela ata os dous anos, ademais de pasar aquí moitas tempadas ao longo da súa corta vida.
O museo reúne mobiliario da familia, fotografías, cartas, obxectos persoais ou documentos orixinais, ademais de proxectar material audiovisual. A planta baixa ensina o Rianxo dos anos 20 a través de fotografías tomadas por un curmán do autor de De catro a catro. Os pisos superiores esténdense na vida e obra de Manuel Antonio..